Мин, Татарстанда иң беренче булып Кояшны каршы ала торган, гомер – гомергә җырлы-моңлы булган Актаныш районында тудым. Районыбыз үзәгендә һәм авылларында җырлый, бии белмәгән бала юктыр. Сәнгатькә омтылыш буыннардан  буыннарга күчеп бара. Мөгаен, Актаныш табигате – урманнары, чишмәләре  иҗади сәләткә уңай йогынты ясыйдыр.

 Татарстан өчен Миңтимер Шәрип улы Шәймиев – эпохаль шәхес. Безнең актанышлылар өчен, ул – Актаныш ягының абруен дөнья тарихына күтәргән шәхес. Шулай ук районыбыз үз вакытында танылган талант ияләрен – җырчы Әлфия Афзалованы, шагыйрь Гамил Афзалны, драматург Риза Ишморатны  һәм  башка бик күп әдәбият, сәнгать әһелләрен биргән.

Шулай ук бүгенге көндә фән һәм  мәгариф министры - Фәттәхов Энгел Нәвап улы якташым булуы,  минем эшчәнлегемә тагы да көчлерәк йогынты ясый.

Нәсел агачым ерак буыннан башлана. Әти-әнием, абыем  хәзерге көндә дә, исән- имин, Актанышта тормыш итәләр.

Актанышка кайчан гына кайтсам да, кире киткәндә, елның нинди фасылы, нинди һава торышы  булуына карамастан, мин Актаныш тауы ягына тукталам. Таудан Агыйдел буендагы болын-кырларны күзәтәм, бормаланып – сыргаланып агуы белән көяз кызларны хәтерләткән, гасырлар буе җырлардан җырларга, халкыбызның илһам чыганагы булган матур елгабыз белән хозурланам. Шушы гүзәллектән көч, дәрт, куәт алып Казанга юл тотам.